印度遊廿四天支出及感想

1US=HKD7.77   1US=RS 48   HKD 1=RS 6.16

車厘子個人總支出:HKD 23694

由印度回來,已經兩個多月啦!透過寫遊記,能夠再次細味印度遊的點點滴滴!當中不少體驗是很難忘的!

印度人其實很友善,很喜歡與我們拍照,握手及交談,但有關錢銀交易方面,便顯得相當奸詐,不得不提防他們獅子開大口,殺價至三成左右也不用覺唔好意思!

廿四日旅程,車厘子最鍾意係喀什米爾及Jaisalmer 的Camel Safari !喀什米爾相比起其他地方,有人間仙境的感覺!在船屋裡,老闆一家人的熱情款待,令我們有賓至如歸的感覺!Camel Safari的旅程,我們第一次在沙漠野餐,睡覺,數星星,更是畢生難忘!至於景點,梗係泰姬陵最震撼啦!

為了節省時間,我們寧可花多六千幾元,搭了六程內陸機!航空公司的服務及效率,比想像中好!另我們搭了六程火車(HKD 931),都選擇了2A Class Sleeper,有冷氣,鄰座的都係旅遊客或是有較富有的印度人,感覺又係比想像中好!十二程飛機+火車都係上網book齊,非常順利方便!delay情況可接受!飛機火車外,都係搭Auto rickshaw多,必須殺價,因見你係遊客,必會將價抬高幾倍至十幾倍!開車前一定要傾好價錢,最好白紙黑字寫低,否則反口覆舌的印度人,必令你有損失!另包車(的士或rickshaw)亦係一個選擇!如一天要遊覽幾個景點,時間又緊迫的話,包車司機係好樂意於景點門口等你的!另一好處係唔使下下找車再講價!

住宿方便,大部份都是上網預約好!好處係唔使到時拿著行李周圍搵!而且可以慢慢揀到啱!當中住Udaipur的皇宮酒店最難忘,重有Jaisalmer的哈維利都好有特色!

飲食方面,我們都好擔心d印度嘢唔啱食,於是帶了好多福麵,餅乾,零食過去!但原來d嘢食唔差o架!而且幾好食添!依家仲好掛住d印度薄餅,masala chicken,同masala tea呀!最鍾意嘅一餐梗係Udaipur Jagmandir 皇宮酒店食既一餐啦!環境,氣氛,服務,食物都係no.1 !至於帶去的食物,都係在火車上食多!記住千祈唔好周街食嘢呀!因為唔知幾時會中招!小心為上!

最後梗係要多謝我兩位鐵腳小高及小梁啦!仲有一直支持車厘子遊記的你呀!

仲有,仲有,要感謝神呀!保守我平安歸來!如果恐怖份子早一星期發動襲擊,車厘子可能係咁大啦!所以話…..生命係掌管在神手裡的!