7.6.09(日) 莫斯科Moscow —-> 杜拜 Dubai —-> 香港
00:40 乘搭阿聯酋航空 06:00到杜拜機場, 再於09:40 於杜拜轉機飛回香港,到港時已是21:45
話說於一開始到達俄羅斯,已經留意邊度有呢款俄羅斯娃娃伏特加賣!點知日日都見唔到!當最後於莫斯科機場,車厘子剛剛用盡晒所有盧布的時候,居然在過關後的免稅店見到有得賣!
於是好興奮的與我及兩個friend及一名團友,每人買了一支!記得領隊話過,於免稅店買酒,只要不打開封口的膠袋,便可上機!
當買完酒後,原來領隊話轉機前(即係於莫斯科)係唔可以買酒的!(杜拜買就得)唓!又唔一早講清楚d!於是齊齊拿酒回免稅試下退貨,售貨員冷冷的說不行,而且show張轉機不可買酒的告示俾我哋睇!
咁….點算呀!領隊話一係上機時”隊”晒佢,一係於杜拜過行李檢查時博一博啦!(博到嘅咩??)
團友真係於機上開咗支酒豪請各位團友飲,我及兩個friend一於打算博一博!
於杜拜過行李檢查的時候,奇蹟地個個都順利過關,吓?乜唔係唔淮帶多過100ml嘅液體上機嘅咩!保安咁弱,喺杜拜搭飛機咪好危險?
唔理啦!過咗海係神仙,總之依家就可以平平安安的帶支酒返黎啦!不過大家以後記住啦,過關後轉機之前千祈唔好於免稅店買有液體的東西呀!
俄羅斯娃娃伏特加酒
團友Irene請我哋飲的伏特加,小朋友無得飲!!
總結及感想篇
今次俄羅斯之行,因朋友擔心冶安問題,於是少有地跟團,之前也有心理準備跟團會很趕,但想不到真的趕得咁厲害!時間有限,但要將行程表上的景點行完,加上團友眾多,等人都去咗好多時間,點會唔趕呀!於是發揮我哋嘅小宇宙,儘量把握每一個可以影相,購物的機會!方法有參觀時提早出外影相,放棄去廁所的機會去購物等!因為唔專心聽導遊講解,所以其實自己去咗邊都唔知,都係返黎之後做下功課,先清楚返咋!
食物及住宿都比期中理想,可能我哋要求唔高啦!因為平時自由行都無咁好嘅食用及酒店!
總支出: 團費 $ 9990, 燃油附加費+機場稅 $2050, 簽証費 $800, 領隊導遊小費 120 x 8日 = $960 , 自己使費 US $450 (HKD 3500) Total : HKD 17300
最唔抵係個簽証啦!再過一個月就可以免簽証啦!早知道,遲少少去就可慳返D嘛!仲有個芭蕾舞表演,US170真係太貴啦!不過一場黎到,貴都睇啦,跟團係要俾人”坤”下架啦!好在我哋早報名,頭十名有discount,已經慳返唔少!之後報名的團友,淨團費高達14599也有!
其中用US$250 分兩次換了盧比, 兌換率 US 1 = 盧比 27.9 , HKD 1 = 盧比 3.6, 其實只係用黎買手信,最尾都使唔晒,但機場的兌換店休息,唔可以兌回美金,只好在機場用貴價買手信用完D盧比!
景點中最鍾意都係聖巴素大教堂,莎哥斯基的聖三一修道院同埋血腥教堂!因為d教堂真係好靚!不過可惜係去到好多教堂門口都無得入!夏宮係好靚,不過真係好似凡爾賽宮囉,無d新鮮感!
以我哋咁多日在俄羅斯觀察所得,一般俄羅斯人係好唔友善的,例如用英語問他們問題,即該耍手兼擰頭,而且擺出一副冷漠的姿態!邀請他們影相,多數都會回敬你一個檸檬!跟團還可,如果自由行,難度會比去其他歐洲國家高呢!
天氣方面,好多日都落雨,搞到影d相真係爭少少!不過好在去聖巴素教堂的一日天氣好好,又有藍天,影d相好靚!氣溫就好似經歷四季咁,7度至30度!不枉我帶咗件羽絨去!
領隊Ken好專業,事事打點得很稱職,脾氣又好,仲做埋導遊果份!不過如果搭長途車的時候,可以講下帶隊時的有趣事,咁我哋唔會咁悶囉!
團友方便,好多都係上年紀的Auntie,Uncle,好開心見到佢哋好幸福的一齊去旅遊,而且好恩愛(當然嗌交時我看不見!)!好高興認識大細佘生, Anita, Irene,毛毛夫婦等人!
最後要多謝今次同行的Vennes, Peony, Jean, Ann and Andy, Blinda,跟車厘子一齊去旅行,因為大家都鍾意影相,買嘢,扮靚靚,所以玩得好開心,!這是我哋一齊共創的美麗回憶!
最後最後梗係要多一直支持車厘子俄羅斯遊記的你啦!有你的留言,是我繼續打blog的動力呢!
沒有留言:
張貼留言