3/8/11(三) 香港—紐約—奧蘭多
話說原本係book咗今日18:30的國泰機去紐約轉機的,後來因為種種原因,可以早到機場,等候後補機位,好好彩又俾我等到喎!真係開心到暈!
可以早一班機飛,換來係唔使於紐約機場過一晚夜,可以早一日到達奧蘭多,仲俾到Suprise屋企人!不過改機票要俾多HKD 1200,仲要改埋下一班轉機的時間,又要加多HKD 1554,機票價錢比預期貴咗D,不過好在早於二月已買機票,原本價錢係最平嗰批,所以拉勻都算係咁啦!換來係可以同屋企人玩多一日,俾多少少錢都算了!
國泰機票(二月尾於國泰網頁買的)
HKD 9370 + Tax 1923 + 改機票 1200=HKD 12493
09:20 車厘子自己一條友,乘搭國泰CX 830班機不停站前往紐約,機程15hrs 50mins
美國簽証係簽在BNO內,但今次去美國,想用特區護照入境,因為家人都係用特區護照,為了萬一有任何意外發生時,可以同家人一齊向中國領事館求助,於是兩本Passport都帶埋去!
成16個鐘頭咁長時間,食下飛機餐….
睇下電影….
繡下花(成個旅程只繡過呢一次)……瞓下覺…..好快就到咗紐約啦!
到步時間比原定的13:10遲咗,13:40至離開飛機,要趕搭下一班14:59的內陸機,真係好趕!(時差慢香港12hrs)
排咗一陣隊,出境時個關員態度真係麻麻!問我點解唔用BNO入境,好在解釋得到就無問題!又話我填錯張出境form,轉機係要填另一張,我唔想再花時間,求其答我係去紐約,至俾我順利過關!
出關後又要等行李,時間已經係13:55,真係心急死我!等咗五分鐘左右,行李到咗,即刻九秒九的走去Jetblue counter,不過唔好以為好近呀,係要由原本的Terminal 7,過對面馬路,搭升降機去AirTrain車站,搭一個站去到Terminal 5,再搭升降機,行一條好長的Skywalk,14:15終於到咗Jetblue的counter,見好長龍,職員叫我使自助check in!好快可以成功取得登機証,真係一額汗!
再去櫃枱寄行李,然後檢查手提行李及搜身入閘,14:35到達飛機閘口,乘客差不多已經上晒機了!
上到飛機,意料中會見到七位屋企人,神神秘秘的去到佢哋面前時,一句Suprise,真係令到佢哋好Suprise呀!因為原本要聽日先至到的!佢哋不知幾開心,所以知道加錢改機票係值得嘅!
14:59 一家人乘搭Jetblue 151班機前往奧蘭多,機程3小時!
Jetblue 機票連稅 (二月尾於Jetblue網頁買的)
HKD 2180 + 改機票 HKD 1554 = HKD 3734
坐我隔離的原來正係在迪士尼世界工作的人員,佢話成日帶家人去玩都唔使錢架!真係好!
17:30 飛機早咗半粒鐘到,落機後不用過關(因為係內陸機),搭了一小段air train到達大堂!
我哋因為會入住Disney Resort,跟據指示係唔需要自己拎行李的,於是直接到達Main Terminal B Side…
17:45 落Level 1 的 Disney’s Magical Express Welcome Center
人客不是太多…
可惜電腦down咗,所以攪咗十幾分鐘!
記住出示貼在登機証後面的認領行李label俾職員,行李將會被送到酒店!
18:00 終於攪掂,可以去上Shuttle Bus
唔同resort有唔同巴士線
住Disney resort,係包埋Shuttle bus往來機場接送的,但我哋回程時並不是由resort離開,所以只有去程時用此服務!
因為要等客,所以要18:25才開車!
如果去郵輪,就係搭呢架專車,不過係要收費的—來回要US 70,遲D我哋去郵輪時就係搭呢架車,因為自己Book車仲化算!
其間經過幾間resort 如 Pop century,All Music等,最後才到我哋的All Star Movies Resort,足足搭咗成粒鐘!
19:20 到達All Star Movies Resort,因為之前已做網上check in,所以好快已然辦好手續!
我哋book了三間房,加埋迪士尼套票都係透過Dreams Unlimited book的,好處係一條龍服務,幫你定下遊玩樂園的時間表,有專人跟進及隨時解答問題,定時給予遊樂園的小tips,幫你book枱食飯等,套票價錢跟迪士尼網頁的一樣,book郵輪時仲有多點折扣!服務不錯的!
19:30 乘搭迪士尼世界的免費接駁巴士往Disney Down Town吃晚餐!巴士每15-20分鐘一班!
19:55 25分鐘車程,到達Disney DownTown,分MarketPlace,Pleasure Island及 West Side三部分,主要都係餐廳及購物的地方!唔使買門票,遊人隨時都入得!
今日先到Market Place,即Down Town的第一個車站落車!
因為暑假係旺季,所以早於3月,網上book呢間Rainforest Cafe,只可book到九點的位,好在經Dreams Unlimited 的Agent Daniel幫我哋book,先至可以book到八點的枱!
20:00去到餐廳的紫色大象攞位,點知仲要等多半粒鐘先至有得入坐!之後醒d啦,要book位時間前的半粒鐘去攞位,就會準時d有得食!(不過始終都係要等!)
等食其間其他人周圍去shopping下先
20:35 有得入坐啦!餐廳好有雨林feel,周圍都有動物,定時會行雷閃電,及有動物叫,好有氣氛,不過都見有小朋友嚇到喊!
其實香港以前於又一城都有一間,我都幫襯過,不過可能唔啱香港人口味,執咗lu!
可能我肚餽,覺得好好食,屋企人因為已經在紐約食咗好多美國餐,對d Steak,Ribs已經怕怕!
Ann and Andy都話好味!
甜品未到,大細姨甥仔已經支持唔住,要瞓覺啦!之前去咗幾日紐約,仲未適應到時差!
甜品到啦!叫咗個火山雪糕蛋糕,D Waiter送過來時會大聲高叫VOL….CAN….NO…..好攪笑!
Volcano來啦!雪糕好食,不過d朱古力蛋糕太甜啦!食唔晒,浪費了!
美國食嘢要俾稅6.5%,以及六人以上,規定要俾18%服務費,埋單共USD 165 (七大一細)HKD 1287
22:00 行咗Downtown一陣,22:30搭Shuttle bus回Resort,
20分鐘車程,於resort跟住地圖行去我哋住Mighty Duck的部份,其他的部份有Toy Story,斑點狗,Fantansia等,今晚夜了,聽日才去影相!
下紅圈是酒店大堂,上紅圈是我哋住的Mighty Duck 酒店,相距3-5分鐘步程!
23:00回到房間,行李已送到!
房間US 140 一晚/雙人房,係迪士尼酒店最平的一個級別!
一分錢,一分貨,質數係一般,但對於車厘子平日自由行住開的平價旅店,呢度好好架啦!
Ann and Andy都話好滿意架啦!
記住自己帶沐浴用品,因呢度只提供番梘及洗頭水!
車厘媽日日都虔誠的祈禱,求神保守我哋旅途上平安!
聽日正式第一日去迪士尼世界玩啦,好緊張呀!
沒有留言:
張貼留言