Day 1 5/3/2011(六) 香港—廣州—加德滿都
大家準備好未呀!期待已久的尼不之旅終於起程啦!
三星期的假期,梗係要買多d糖果,餅乾,零食啦….hehe仲有福麵呀,不過今次只買了五包!
11:50 出門啦!
今次唔係去搭機場巴士,而係搭火車上廣州,於白雲機場搭飛機去尼泊爾!
12:40到達紅磡港鐵站的廣九直通車總站,會合隊友小高及小蔡
13:10 乘搭直通車(HKD 190,2 hrs)往廣州東站
兩小時車程,梗係繡下花啦!
Ann and Andy都幫我打氣!
15:12 落火車,跟住過關,不是太多人,所以好順利!
依水牌指示去地鐵站轉乘地鐵!
到達地鐵站,要買飛由廣州東站去機場南站
見有人排隊,問下人係咪可以在此買飛去機場南站,點知俾人老點,埋到去售票員話去機場南站一定要在售票機買!!!攪錯!
再行過去售票機,好多人,好混亂,要自備零錢購票!RMB 12/P
話購票,其實唔係票,而係一個籌碼形的牌仔,嘟一嘟,入閘!
乘搭3號黃色線
落火車至入到地鐵,差唔多攪咗成粒鐘!
16:00 地鐵開出
一共要搭十個站!
16:31 車程半小時,終於到達廣州白雲機場
搭電梯上三樓機場大堂
16:40 於中國南方航空公司櫃枱Check in
成個下午都未食嘢,都係咬返個包先!
寄倉行李三大一小,紅色果兩件係車厘子的,重16kg+8.2kg,如果再加埋手提行李4.1kg,共重28.3kg,可能人地去流浪幾個月都無我d行李咁重!
19:15 乘搭CZ3067南方航空客機(機票連稅HKD 4300,4.5 hrs)直航前往尼泊爾首都加德滿都Kathmandu
21:30 (時差慢香港2hr15mins)到達加德滿都,因為已預早做了簽証,所以好快可以排隊出關!
後來知道尼泊爾航空於同一晚由香港出發,delay了兩粒鐘才到達加德滿都,心裡暗地裡高興無搭呢架機,點知…..我哋南方航空回程嘅航班……
有兌換錢的地方,不過機場匯率唔抵,暫時唔需要用尼泊爾錢,返到Guest House才兌, US 1=RS 71=HKD 7.8 1RS=HKD 0.11
機場好細,取回行李步出機場!
22:20 好嘢,最開心就係有Free pick up,係Guest House嘅service!
車程20分鐘,到達網上預約好的Kathmandu Madhuban Guest House
因為我係在Hostelworld.com 預約的,所以價錢比guest house自己的網頁貴少少! Rs 1050/3 (HKD 116/3) ensuite bed room,平均每人都係HKD 39一晚,算係好平,所以對Guest house的期望不大!
Gusest house地點方便,位於塔美爾區Thamel,不過大門口不顯眼,好多的士司機都唔識路送我哋返嚟,要靠自己認路!
老闆Laxman(右手邊的一位)及職員都好nice!一切服務都很好!因為我哋後來多次返來呢間Guest House住,所以同佢哋已經好熟絡,後來我哋話想去Laxman家晚餐,他都答應了!在這裡住,真有賓至如歸的感覺!
至於房間清潔,夠大,有Wifi,不過好慢!
浴室夠大,有熱水,不過水流細咗小小!不過都值得推薦!
剛才由機場回Guesthouse途中,已發現四維都黑媽媽,間中才有些商店有燈光!回到Guesthouse,也是很黑暗,點著蠟燭,房間內只有一小個燈泡有電!
原來尼泊爾近年來,於旱季時間都要全國性節約用電,由08年每周停電45小時至68小時,10年74小時,至今年需要每週停98小時,即係每日要停14小時,引起非常的不便!
停電的時間表,每日都要留意幾時才有電!
由於尼泊爾的電力供應依靠水力發電,每年旱季(十月至五月)河水水位下降,水庫儲量不足,水力發電能力大減,引致好多工廠由於長期缺電而難以維持正常生產,有些甚至倒閉或瀕臨倒閉!
雖然尼泊爾位於喜馬拉雅山,冰山融化為國家提供了豐富的水力資源,但由於資金和技術問題及國內局勢影響,水力資源開發量還很小,僅為可開發量的2%!
沒有留言:
張貼留言