用了半年時間,終於寫完了三十天遊記!實在值得慶祝一下!慶祝前先來個總結吧!
車厘子呢次去呢七個國家—波斯尼亞,黑山共和國,克羅地亞,斯洛文尼亞,匈牙利,羅馬尼亞及保加利亞,其實真係趕咗D,好似羅馬尼亞同保加利亞,地方好大,仲有好多地方可以慢慢玩!而且消費係最便宜的兩個國家呢!無法啦!唯有第日有機會再去過!
玩得最開心係Day 6於黑山去 Islands day trip 嗰日,因為識咗個烏克蘭家庭,同個小妹妹玩咗一日,雖然大家言語不通,但係靠住身體語言,大家都玩得好開心!
三十日旅程,個人總消費HKD 31000,其中機票已佔25%,所以買機票時要格多幾間Agent公司,仲要早D買先會更平!香港往返波斯尼亞及羅馬尼亞,都係無直航的,因為我哋坐漢莎航空,所以要經德國轉機,機票HKD 7693連稅,算係好OK啦!
交通主要是火車及巴士(不用買火車証),尚算準時!為咗節省時間,我哋搭咗三程夜火車,最難忘係斯洛文尼亞去匈牙利嗰程夜車,為咗慳錢,上咗車之後唔加錢瞓卧鋪而去瞓坐位,嗰晚又凍又瞓得唔舒適,下次都咪攪!
住宿方面多數係於出發前預約好,會比較節省時間!只有幾次因為上網揀唔啱,所以去到目的地才找,不過會比較刺激D囉!住過咁多間,最鍾意都係羅馬尼亞Brasov嗰間好多古董嘅住宿,主人家Uncle David 同Aunte Mary又非常Nice!可惜佢哋無e-mail,唔可以同佢哋聯絡啦!
為咗慳錢,梗係唔可以餐餐豪食啦!你哋有眼見,朝朝早餐同午餐,都好鬼淒涼架!夜晚嗰餐,先至話可以坐低食得好少少咁囉!而食得最豪同最開心嗰餐,係於羅馬尼亞嘅Bucharest食宮廷菜,真係至今都好難忘!
買手信都去咗我唔少彈藥,以下係我嘅戰利品,唔知你有無份呢?
在此要多謝我旅遊Partner小高,其實主要行程係佢plan的,謝謝好的付出及照顧!我哋又要再咪書啦!11月向南美出發!
當然唔少得要多謝一直支持車厘子個blog嘅你啦!自問自己文筆不好,相片又影得唔靚,不過誠意搭夠,希望可以帶你去體會一下我的旅程,同埋可以幫到正在plan行程的你啦!
行程表可以去呢度download,同埋有個錄音版喎,歡迎收聽!
今次都有紀念品送出,以小小心意答謝大家!方法好簡單,只要你於今日(28/4)之前,曾在車厘子巴爾幹之旅三十天網誌內留過言,已經合資格啦!名額有六個,先到先得!記住按私人回應留地址呀!禮物會於集齊六人後一起寄出!
得獎者:
1.雀屎 2.野孩子.三耳 3.Jennifer 4.Floria 5.笨豬燕 6.阿ca
8/5/10 紀念品已全部送出,謝謝各位網友支持!
