Day13 17/3/2011(四) 尼泊爾—>不丹-帕羅Paro
06:35 今日要去不丹啦!酒店職員幫我哋叫了的士前往機場Rs 400/2P (HKD 44/2P)
07:05 到達加德滿都國際機場
往不丹皇家航空櫃枱Check in,機票連稅HKD 3911/P(因無位,回程係商務客位價),往不丹只有呢間航空公司,往來呢三個國家—尼泊爾,泰國及印度,如果想由香港出發,就要轉機啦!
原本08:20起飛,但終於delay到10:30才起飛!於機場認識了六個都係前往台灣女子!
機程一小時,所以只供應簡餐,呢個就係我嘅早餐!
坐我隔離的,係來自美國的ABC男仔Micheal及佢Auntie,大家交流一下book不丹tour的心得!大家可click呢度重溫book不丹tour的各種事項!
飛機航線會經過喜瑪拉雅山脈,非常壯觀,當經過最高峰的珠穆朗瑪峰時,機長會有廣播,人人都貼近窗口不斷咁影,不過要坐左邊先至影到,我哋遲咗check in,所以坐右邊,於是要去機尾的窗口至影到!
11:30 期待已久,傳說中的快樂國度—不丹,我哋終於到步啦!
機場位於帕羅Paro,但不丹的首都其實係廷布Thimphu,因首都已無地方起機場,所以機場建於Paro!
機場的建築物都好有特色及傳統!
一落機,不丹的歷屆國皇都來歡迎我哋!右手邊第一個靚仔,就係現任國皇King 5th凱薩爾﹒旺楚克,於08年只有28歲的他便登基了,成為全世界最年輕的國皇!
當時仲係單身的國皇,不少女子仍對嫁入皇室有份希冀,不過,於五月時King 5th 終於宣佈,將於今年十月與平民女子Jetsum Pema結婚啦!大家死咗條心佢啦!
未來皇后係幾靚女喎!
講返機場先!
11:50 去機場大堂攞行李,地方不是很大,但是明顯比起尼泊爾機場清潔,光鮮得多!
因為來不丹,一定要跟團,所以出機場時,即見好多不同公司的導遊來接機!
我哋梗係唔例外啦!左手面的是導遊Kinley(音 基B),三十來歲,很愛玩的!右手面的是司機Wang Chuk,佢有中國人血統架,所以係姓Wang!佢哋兩個在呢六日會貼身咁服務我同小高,十足係VIP咁!
呢架係載足我哋六日嘅…..Van仔?得我哋兩個客仔,使唔使咁大架車呀?基B話因為呢幾日係節日,公司每一架車都有booking,只剩低呢架車喎!不過都OK啦,坐得好寬敞,係覺得嘥咗D啫!
呢間就係接待我哋的不丹旅行社
12:30 Wang Chuk先車我哋返酒店check in,約半小時車程!
我哋住嘅係Tandining Resort,係基本團費住的基本級數酒店,想住好d,加錢啦!
不過其實基本級數得嚟,酒店嘅環境同服務都唔差架!
第一間1號房係我哋住嘅房,先住三晚,之後兩晚會般過去靚d又大嘅房!因為我哋遲book團,所以靚房俾人哋book晒!
報團時都有問過我哋五晚內想唔想般酒店,考慮過要去的地方車程並不遙遠,所以費事執行李,五晚都住在呢間酒店算了!
比起尼泊爾嘅房,呢間好好多!
13:00 安頓好後,於酒店的餐廳食午餐
酒店的服務員都好nice,又有禮貌,人人都懂英文,溝通一d困難都無!呢個係Chunku (音 充古),只有廿歲,每日都細心的服務我哋!
午餐時會將我哋二人的飯,麵,餸全放在枱上,然後任我哋食,通常份量都很多,會食剩的,不夠可隨意再添加!
還有飯後果!
14:20 飯後去參觀景點啦!
先去建於山上的塔宗Ta Dzong,(Dzong音 宗,即修道院堡壘)
費用200 Nu,不過當然係圑費已包啦!
1 US=42 Nu
塔宗原是1641年初蓋在山上的一座瞭望塔,外觀如一座圓筒形堡壘,於1968年已改為歷史博物館!
博物館內可參觀的東西十分豐富,包括唐卡,郵票,佛像,錢幣,衣服,飾物,武器等等,不過內部不可拍照!基B全程作講解,開頭都有D心機聽,不過今朝太早起身,後來聽到我好眼瞓,頻頻放蚊,攪到佢講到好無癮!
從山上望下去的Paro鎮中心點
三月時份,好多地方都有開住類似櫻花的樹木
不丹的男仕傳統服裝叫Gho
女仕的傳統服裝叫Kira,呢幾日係節日Tsechu,人人都著得靚靚的上街,我哋叫基B帶我哋去買Kira!
16:00 於是基B就開始帶我哋去買Kira,呢間有埋紡織過程供參觀
人手織出來的Kira很美麗,好吸引,可惜價錢非常昂貴!每件起碼HKD千幾二千銀,都係唔啱我哋買!
跟住基B仲繼續帶我哋去”中藝A鋪” “中藝B鋪” “中藝C鋪”,間間賣D嘢都係好貴貴貴!呀基B,唔係人人嚟不丹玩的都係好有錢架!
終於都只係買咗D不丹郵票算啦!俾美金,找返少少不丹錢做紀念!
跟住我哋同基B講,唔使帶住我哋啦,我哋想自己去Shopping!
無佢帶住,我哋梗係去搵d平民店睇嘢啦!
終於俾我哋搵到幾間賣好平嘅機織Kira,成套都只係HKD 200左右,仲配埋心口針添!小高一套,我一套,仲可以大家調換著,Good!
顏色好Sharp,好靚,我鐘意!
19:00 約好基B,七點去食晚餐,鎮內嘅餐廳都係做團餐多,因為唔會有自由行的遊客!
先來一個湯
跟住又係一兜兜放在我哋面前慢慢食!味道都不錯,有D似中餐,起碼好過尼泊爾的好多!
20:00 食完之後,基B及司機Wangchuk護送我哋返酒店!
聽日去睇精彩的Tsechu慶祝節目!
沒有留言:
張貼留言