終於計好條數啦!可以同大家分享一下!
廿三日尼泊爾+不丹之旅,個人總開支係HKD 26230
不丹團HKD 9766,係計咗—基本團費USD 230 X 5日,簽証費US20,手續費HKD250,小費US 50. 再加上不丹機票連稅HKD3911,一共係HKD 13677,不丹佔咗六日,但係使費已經佔去總開支一半有多,太貴啦!所以….去六日夠架啦!再去耐D就唔得掂了!(不丹費用可參考不丹預備篇)
尼泊爾機票HKD 4300,今次選擇了由廣州出發的南方航空,格價之後係最平的一間,但試過之後,真係覺得幾麻煩,尤其係回程嘅時候,已經倦到死,重要千里迢迢咁返屋企,為的是—慳得就慳,但其實比起香港出發的尼泊爾航空,都唔係真係平好多,但因為怕尼航容易Delay,所以至揀南航,但最尾南航連我哋嘅原有回程航班都取消埋,要提早一日回港,所以搭南航都唔係好棧!(可參考最後一日的分享)
哈!原來跟住排位係購物啦!HKD 2075,都唔覺買咗好多嘢啫!最多都係衫啦!有民族衫,返香港著嘅衫褲都有!仲有喺尼泊爾買俾屋企人嘅保暖襪套,都買咗五舊幾水架!在尼泊爾買嘢記住要殺價,咁至買到平嘢!唔去唔知,D運動用品店嘅貨,大大大部都係番梘貨嚟架!
跟住到食啦!食真係好鬼平,食得豪D都係港紙百幾蚊一餐,不過尼泊爾餐都唔係幾啱我口味!唯有食Pizza,意粉,momo(餃子)咁啦!但又唔係咁好食喎!尤其係山上面嗰幾日,食嘅嘢日日都差唔多,真係好悶!仲有係去到不丹嘅時候,肚仔已經開始唔舒服,有輕瀉嘅情況,原來有好多人都話去完尼泊爾都有咁嘅情況,不過真係無得避,唔通唔食咩!最開心係去Laxman屋企食嗰餐,又好食,又可以更加認識尼泊爾人的生活文化,仲同佢哋成為朋友添!
計落搭車都唔係好貴,最貴都係包車去玩,不過豪又得起喎,因為比起其他地方,邊可以成日包車架!
奇旺團三日兩夜HKD 780屬中價,因為酒店有冷氣架!如果有時間,呢個團好值得去!比起成日在古城睇廟宇古蹟,真係有趣得多!仲可以俾象象同我沖涼,唔係…係我同象象沖涼,真係好好玩架!
健行費用HKD 757係去Poon Hill五日四夜的費用,包括:導遊費USD 75/3P+Tips 15/3P, Porter費 USD 60/3P+Tips 10/3P,登山証ACA Entry Permit RS 2000/P,及TIMS Card RS 1100/P,分開俾錢,比起導遊提供的Package價更化算!(可參考Day 8的計算)
住宿真係好鬼平,加德滿都的酒店都只係HKD 30-40/P一晚,不過要求唔好過高就得啦!勝在有個親切的老闆Laxman!佢仲可幫你安排旅程所需,不過都要殺價架!最好於出面旅行社問下價,再比較價錢會好d!最平住宿梗係在行山嗰幾日啦!無洗手間在房的一晚,只係HKD 7.3/P,真係平到笑呀!不過沖涼要另加錢架!天氣咁涷,唔沖就罷囉!最貴一晚係D18那加閣的Hotel View Point,要HKD90/P一晚,因為在山上最高點喎,睇日出上天台睇就OK,乜都抵返啦!
入場費都好平下,有D可以HKD 2.2就有交易,最貴都係D19去巴克塔布古城Bhaktapur HKD 121,因為我用BNO,價錢貴成十一倍呀!最衰係我個特區護照過咗期,咪要俾貴D囉!於古蹟門口,通常都有D人在找生意,可以帶你遊古蹟並講解歷史,然後收取導解費,一般價錢不高,港紙幾十蚊有交易,不過講得好唔好,真係一個個,可能自己睇旅遊書知得更多!所以要睇你好唔好彩!
娛樂方面,其實得好少咋,就係D3遊下船河,D9按下摩,D15浸熱石浴及D17騎馬上山,其中浸熱石浴係最新奇好玩!
其他HKD 333,主要係尼泊爾的簽証費HKD 320(可參考尼泊爾預備篇),其他HKD 13係上網,小費等!
歡迎去呢度下載行程文字版
沒有留言:
張貼留言