12.9.09(六) 克羅地亞—Dubrovnik (Islands Day Trip)
08:10 於民宿小廚吃公仔麵做早餐,本打算早餐後去古城行城牆,跟住10:30出發往船河Day trip!點知……
出門的時候發覺陰天+有毛毛雨,於是拎返件Gortex外衣先(傘日日都跟身),點知….點解唔見咗嘅?左諗,右諗….呀!因為呢幾日都陽光普照,都無著過件Gortex,諗返起幾日前,一去到黑山共和國的Budva酒店時,將外套掛在衣柜內,尋日走的時候無拿走呢!
點算呢?今日仲俾咗錢報tour的!一係就唔要件外套,照去tour,一係就我一個人回Budva取衣,小高去tour,不過小高好有義氣咁話”要去就一齊去”喎!
再冷靜d諗下,都係email過去酒店confirm下件衫係唔係在衣柜先!呀!唔係!係打電話仲快,但係要叫醒男戶主Gojko起身,用佢個電腦搵返酒店個電話!搵到電話後,Gojko幫我哋打電話去酒店問,confirm了件衫仍在那裡,我哋叫佢不如搵人送件衫過來,最多我哋俾返車馬費,點知酒店方面更高招,搵人送件衫去巴士站,叫巴士司機送過來Dubrovnik,叫我哋17:00於Dubrovnik Gruz巴士站接回件衫!
但係,我哋報咗團喎,要18:00才回到古城,點可以17:00去到巴士站呢!我哋叫男戶主再打電話去酒店,叫巴士司機將件衫先放在Dubrovnik的counter,我哋夜d再去攞,但屋主話”自己唔見咗嘢,唔可以再叫人哋點做點做喎”!跟住未等我哋出口,女戶主已經話佢哋唔會幫我哋去攞衫,因為要….瞓覺….男戶主又再話”自己唔見咗嘅嘢,要自己去攞返喎”!唔幫就算,唔好講咁多嘢!OK!我哋自己再想辦法!
我哋出門去船公司,將情況告知女職員,問佢可唔可以搵人幫手去攞返件衫,講咗好耐,終於都話唔得!
最後一著,就係去到碼頭集合的地方,再搵船公司的職員Daniel幫手,佢好helpful,即刻幫我哋成功搵咗個friend今日五點去攞衫!我話要俾返€20佢個friend,佢話唔使咁多,係咁依50kn(HKD 78)得啦!真係老實!所以我話一定要在網上表揚佢!
10:30 我哋不知幾開心,因為問題已經解決咗,可以安心上船去玩咯!
今日就係搭呢一架遊艇!真係有啱得咁橋,同團居然遇上三個香港女仔,最尾知道原來大家都係同行噃!你話係唔係有緣呢!
今日去的Elaphite Islands,包括三個小島Kolocep,Sipan 及Lopud
11:40第一站先去Kolocep,個島好細,況且時間得45分鐘,又無領隊,我哋都係周圍逛下,不過可以行的地方唔多,影下相,好快上返船!
13:00 到達第二站 Sipan,不過先停在岸邊午餐
午餐係魚餐或雞餐(團費包的),仲有紅酒送!魚就幾好食,雞就鞋拾拾,認真難食!
13:40午餐後上岸,遊Sipan,係一個小魚村,比之前的Kolocep大小小咁啦!不過都係無乜地方好行,半小時後上船!
14:15 再上返船繼續航行,廚師將我哋食剩的魚骨,表演餵海鷗!吸引了好多海鷗…同埋團友影相!
仲要用個口來餵!
但餵海鷗的後果,係換來傷痕累累!
14:35 到達第三站Lopud,呢度可以逗留耐d,所以可以在沙灘游下水!不過今日天色真係麻麻,氣溫只得十幾度!車厘子重諗緊落唔落水好!
行下個村先啦!
見有檔生果,買咗香蕉及桃駁梨,16.4kn/2p (HKD 26)
逛完小島後,見那其中一個香港女子游水游得好開心,於是加入一齊玩水!仲有兩隻狗狗一齊黎玩添!不過d水真係好涷!
17:00 回程,總結今日的船河,係不值得推介的,三個小島甚無睇頭,不來可以省回一日時間!
因為昨天已購買了明天08:00的車票往Split,但因為今朝為了處理取衫事宜,沒有時間行城牆,不到城牆非好漢,唔去應該有遺憾,所以都係決定去巴士站改票,改搭11:00的巴士!不過要多付10%的手續費!
18:00 本可在Old port(古城)上岸,但係我哋想去Gruz的巴士站改票,所以18:50可於Lapad或Gruz上岸,但係俾人老點,於Lapad上了岸,害得我哋行咗45分鐘才到Gruz的巴士站!
改完票即乘no.1巴士10kn (HKD 15.6)由Gruz回古城,梗係第一時間去船公司攞返件Gortex啦!到船公司,終於同件Gortex重逢,真係悲喜交集! Gortex呀Gortex,我以後都唔會瀨底你唔帶你走架啦!!!
20:15 晚餐於古城內的Spaghetteria Toni
Lasagne Marinero(海鮮千層麵),Tagliatelle with salmon(三文魚闊條麵) 140kn/2p (HKD 219)
晚餐後再Shopping一會,21:45回民宿
沒有留言:
張貼留言