14/11/10(日) 玻利維亞—阿瑪遜團Day 2
07:30 食早餐,咦?估唔到又幾豐富喎,比尋日晚餐還要好!
早餐後,齊齊先去揀水鞋,因為今日要行叢林,要澗水踩泥”辦”,大家在千揀萬揀,Size就揀啱,不過…..
08:35 出發啦!先坐船仔過對面岸!
導遊Tony 一邊帶我哋行,一邊搵動物俾我哋睇!
咦!見唔見呀?有隻泥蛙呀!
繼續行,天氣勁熱,仲要著住長袖衫,真係行得好辛苦!
遠遠又見到d不知名雀仔!
Tony跟住搵到一條大蟒蛇乾屍,相信已死咗好耐,我哋諗梗係每次導遊帶團時都執起佢講一次!
勁多蚊,你哋睇…..
再睇……係咪嚇死人呢!車厘子尋日同聽日都著咗防蚊衫,但係今日只著咗普通長袖衫就出咗事啦!D蚊針到我成背脊都係蚊”難”呀!痕到我飛起!!!
個窿有嘢睇….係條蛇嚟架!不過黑得濟,影唔倒!
跟住到條鱷魚骨,你都有今日啦!
跟住緊張時刻到, Tony發現草叢裡有鱷魚,個個即刻彈開十幾尺遠!因為不是在船上,所以都係小心D好!
好陰濕的一條鱷魚!
澗水就係考驗對水鞋合唔合格嘅時候,結果小高,小陳,小蔡對水鞋入晒水,只有車厘子對水鞋保住對腳乾爽的回基地,佢哋….?對腳就慘囉!小陳話佢對襪洗咗廿幾次,都仲未洗乾淨呀,足之就掉咗落垃圾筒囉!小高話….我一早掉咗啦!
11:30 烈日當空底下行咗三粒鐘,真係好金,回基地想買汽水,點知無晒!啤酒都殺啦!飲過冰凍啤酒,爽!
咁好太陽,最好就係晒衫!
12:00 沖完涼,休息過後,到飯堂食午餐
可能太肚餓,開始時唔記得咗影相!食物一般!
餐後係又係休息時間,大家去網床午睡
15:00 下午準備好”架撐”出發去釣食人魚,好好玩,好開心呀!
經過見到D小朋友在遊水,唔知附近有無鱷魚呢?
15:30 去到一陰頂地方,停低小船,開如釣食人魚啦!
澳洲代表選手
香港代表選手
第一條係由小高釣到,係一條Pirana Amarillo的食人魚
你睇真係有好尖嘅牙架!
跟住第二,第三條都係小高釣到的,實在太厲害啦!呢條係紅色食人魚Pirana Roja
澳洲隊開始發力,又係釣了一條紅色食人魚Pirana Roja
跟住車厘子都唔執輸,釣到一條cut fish Pas Gato
17:00 見好耐都唔發市,所以轉移陣地再釣過!結果俾小高再釣了一條好大的cut fish Pas Gato
弊,走魚,要”畢”走d水至可以捉起佢,不過影完相都係將佢哋放生!
今日釣魚比賽結果,香港隊大勝澳洲隊 5:1
17:45 上岸看日落
有一小家庭,有飲品出售,梗係要飲返支汽水!
可愛的小妹妹
一邊等睇日出,團友一邊打排球!
19:00 睇完日落,再上船,晚上太多蚊了,要出動蚊網笠住個頭,就非常安全啦!
晚上看鱷魚,用燈照住,原來佢哋d眼仔係會發光架!
日頭都唔發覺河兩邊有咁多鱷魚,一照之下,佢哋顯露無遺,一顆一顆的好似聖誕樹上的燈飾,好得意!
19:30 回巢晚餐,今晚又比尋晚好好多!
21:10 大會關燈,瞓覺,都係好熱,好難入睡!
沒有留言:
張貼留言