17/11/10(三) 玻利維亞—拉巴斯La Paz—>秘魯—普諾Puno
今日07:30要搭長途車,經科帕卡瓦納Copacabana,前往秘魯的普諾Puno
因酒店早餐07:30才有供應,所以今日食自己—又係質高味美,營養衛生的福麵!
巴士由酒店昨天代訂(Diana Tours),於酒店門外pick up,非常方便 Bs 60/P (HKD 74)
07:30 收拾行李,有專人帶我哋出酒店街口上車
10:10 到達San Pablo de Tiquina,要坐船仔過對岸的San Pedro de Tiquina
搭小船,要另買船飛Bs 1.5/P (HKD1.9)
落船啦!可以遊埋船河,幾好玩喎!
這湖是的的喀喀湖Lake Titicaca的一部份,屬於玻利維亞國境,湖的另一邊,則是屬於秘魯的!
人有人搭,車有車搭,呢架咪係我哋嘅旅遊巴士囉!
10:30 船程十分鐘,到達San Pedro de Tiquina
等候巴士上岸,期間行下企下,終於敵不過零食檔的誘惑!
係小陳出錢請食架!多謝晒!有三角朱古力同芝士波波呀!好味!
10:45 再上旅遊巴,前往科帕卡瓦納Copacabana,沿途靠著的的喀喀湖行駛,風光如畫!
11:40 一小時車程,到達科帕卡瓦納Copacabana,放飯時間,順便遊覽呢個小鎮! 13:30 再集合上車!
好多遊客會在此住一晚,遊覽的的喀喀湖上的太陽島Isla del Sol,但係我哋時間緊迫,所以唔會在此逗留,稍後會再過境往秘魯的Puno!
小蔡要寄Post card,所以一齊先去找郵局
搵呀搵…唔係呢間….
搵呀搵…..
小高:請問你知唔知郵局喺邊?(疑似西班牙話) 女仕:我都唔知你講乜?(西班牙話)
終於搵到,原來只係一個小小的Office,我哋買完郵票即關門大吉,我哋真好彩!(不過小蔡話到依家都未收到由呢度寄出嘅postcard!)
其間經過大教堂,看見汽車禱告的車子Benediciones de Movilidades,唔知係咪希望同車子祈完禱,交通意外會少d?
12:15 落車之後,車厘子一邊行一邊氣喘,好辛苦,好嘢!終於可以在呢間6 de Agosto Restaurant坐低食lunch啦!
哎呀!今日明明早餐後先至食隻防瘧疾藥,點解都有想嘔感覺嘅?唔通係高山反應,但係我無頭痛喎!
仲要加埋阿姨媽山長水遠嚟探我,搞到我肚仔鬼死咁痛,等食期間辛苦到我想死,餐廳入面很局促,於是出咗花園,坐又唔係,企又唔係,於是踎咗喺地下,終於嘔咗出嚟,舒服咗d,不過仲好肚痛!
叫咗個魚飯,都無胃口食,於是將佢打包!Bs 160/4P (HKD 198)
小高於等食其間,去咗參觀教堂!
13:15 佢哋食完飯之後,小陳幫我拎袋,小高參扶下,返回Diana Tour旅遊巴公司,13:30再上旅遊巴!
之前食咗止痛藥,加上在車上休息了半小時,情況已經好好多!
14:00 到達玻利維亞邊境Kasani,排隊辦理出境手續
隔離有Toilet及士多
跟住自己步行過境,只需五分鐘步程
過咗拱門之後,好嘢!到咗秘魯啦!
秘魯話歡迎我哋呀!
跟住辦理入境手續,持BNO或特區護照均免簽証
14:25 即係秘魯時間13:25 (慢香港13hrs)
再上旅遊巴,搭兩個多小時車,15:45終於到達普諾Puno(海拔3850尺)
在車上瞓得非常好,落車後個人重吽下吽下!取回行李,都未考究去邊度搭的士,識講英文的壞人Roberto已經出現咗!
佢話有的士載我哋去酒店,開價Sol 10,我哋話未唱秘魯錢,佢就拉起小高的行李走,話帶我哋去唱錢啦!當時真係唔精靈,咁就跟咗佢走,價又未講好,連Sol 10即係幾多錢都未知!
壞人Roberto帶我哋到巴士站嘅士多唱錢
平均兌換價 1 US =Sol 2.79 1 Sol=HKD 2.79
好在架車都唔錯
點知原來架車唔係佢架!佢無位坐,所以屈咗喺車尾,服咗佢!佢收咗我哋Sol 10(HKD 27.9)之後,同司機拆帳,從中食佣!後來至知由巴士站去酒店只需Sol 5-6 !
16:05 到達網上預約好的酒店Camino Real Turistico,壞人Roberto跟我哋來酒店的用意,其實就是想做我哋未來幾日的生意!
明天打算下午去Sillustani看遺跡,及後日去兩天的的喀喀湖Lake Titicaca島嶼遊,壞人Roberto話可以帶我哋去,並詳細講好各項安排,再三問清楚是否只有我哋四人一團,有他帶領,並沿途作英語講解,佢都話係!
其實都有爭扎過好唔好信佢,不過見佢咁有心跟我哋返酒店,加上當時唔知道佢咁衰,就落咗佢搭!跟住車厘子發揮講價本色:Sillustani團開價Sol 120/4P,講價至Sol 80/4P ; 兩天島嶼遊US 25/P,講價至US 17/P!包團喎,我哋心諗真係好抵!包團喎!最後仲俾埋US 10 Deposit佢,佢就開返單俾我哋!
16:50 呢壇嘢搞咗差唔多成個鐘,終於可以飲返杯Welcome drink Coca Tea
呢個老闆及酒店職員都好nice及好helpful!地點方便,價錢合理,房間清潔,有Wifi及internet服務,包早餐,值得推介!
Ensuite Twin Room US 34/Room
17:00 今日無食午餐,好肚餓,食返打包回來的魚飯,d飯凍咗,當然唔好食!
18:00 休息過後,再去唱錢,原來酒店外面的Independencia大街有好多旅行社及兌換店,當然唔少得的是紀念品店啦!
八下去兩天島嶼遊的價錢,都係US 17/P左右,有D安心!
18:40 酒店老闆介紹我哋去附近的Heros餐廳晚餐
除我哋之外,只得另外一台客,有d懷疑呢間餐廳點做得住!咁都介紹我哋嚟,好大機會酒店老闆係有股份的!
車厘子之前食咗個魚飯,所以只叫咗個湯飲!
食物一般,埋單Sol 100/4P (HKD 279) 秘魯使費比玻利維亞稍高,但都算很便宜!
20:00 回酒店,上網Book了幾天後Aguas Calientes的住宿
另上網PERURAIL買Cusco的火車票,要入好多資料,但是Wifi間中斷線,多次嘗試,搞咗好耐,未能成功….放棄….
沒有留言:
張貼留言