19/11/10 (五) 秘魯—普諾Puno(的的喀喀湖Lake Titicaca)
07:15 於酒店早餐,之後寄存大行李於酒店,只拎小行李,參加二日一夜的島嶼遊,今晚會在民宿住一晚!
07:40 Lago Tours 的旅遊車來pick up我哋去碼頭
接晒各團友一共16人,09:10到達碼頭,職員提議我哋買d米,糖或通粉俾民宿家庭,一共買咗三包,加埋買咗支2 litre水大家飲,共Sol 10 (HKD 27.9)
行去碼頭搭船,呢個時候,壞人Roberto又出現咗,因為佢要收埋d尾數嘛,仲同我哋講要再收什麼什麼附加費,我哋一於無睬佢,直至上到船,我哋搵埋導遊做証,三口六面俾埋尾數佢 US 17 X 4P = US68 -US10 deposit =US 58,免得佢又再出蠱惑!
08:20 開航啦!導遊在船上自我介紹,及講解呢兩日的行程!雙語廣播!
乘搭的遊艇都幾舒服,暢遊的的喀喀湖Lake Titicaca,心情開朗!
的的喀喀湖是南美洲最大,也是世界上海拔最高(3850尺),適合大船航行的湖!
09:00 四十分鐘後,到達漂浮島Islas Flotantes,又稱Uros蘆葦島,因這些一個一個的小島都是用有浮力的Totora蘆葦堆積而成,這蘆葦是的的喀喀湖的特產!
這裡有約四十個籃球場大小的浮島,住有Uros人約二千!
Uros人用蘆葦建造房屋,船,及製作工藝品賣給旅客!
水上商店
每個小島都住有一個家庭,旅行團安排我哋參觀其中一個小島
嘩!同之前睇相一樣,佢哋d衫好colourful,影d相出嚟好靚!
落船啦!好開心!雙腳踏上蘆葦草上,軟淋淋的,好過癮!
日日都有旅行團來,佢哋已經做到好商業化!我哋一上船,島上的人各就各位,有的跟你拍照,有的拉你去睇紀念品,連小朋友也出馬,叫你買佢畫的塗鴉畫….
之後導遊安排我哋坐下來,Uros人為我哋講解建造蘆葦島的方法及生活方式!
浮島的底部由蘆葦根及泥土建造而成,再縱橫交錯的鋪上蘆葦草超過1.5米,而且會不斷加上蘆葦草更新!每一個島之間要用繩連繫起來,否則島會飄走,甚至會去到玻利維亞嗰邊!
聽完講解,自由活動,可以參觀佢哋的”屋企”!屋企好細,好簡陋!
跟住仲可以俾我哋著上佢哋d民俗服影相,開正車厘子果瓣,不知幾開心,影咗好多相!
著咗佢哋d衫,居然無主動問我要錢,於是幫襯返佢哋啦!不過d紀念品價錢比起其他地方偏貴,而且唔肯減價!
買咗呢隻船仔,Sol 10 (HKD 27.9)
三斤抱兩斤的小朋友
很可愛,好似個公仔!
09:50 離開啦!佢哋一齊唱歌歡送我哋!車厘子回贈佢哋一首”有隻雀仔跌落水”!
前往另一Uros小島,可自由選擇搭蘆葦小船,或是搭返之前的遊艇前往!咁得意,梗係試下啦!無問價錢就上咗船!
我哋係搭呢款細蘆葦船
船伕,辛苦晒啦!
另外一款係呢隻”雙體船”!
沿途影下相,好快就到!
10:00 十分鐘船程,到達另一小島Quechua,蘆葦船收費Sol 10/P (HKD 27.9)好彩都唔係好貴!
呢個島好似淨係俾人購物架喎,仲有餐廳!
聽聞話呢d蘆葦船仔,買返去潮濕的香港會變發毛o架,所以唔敢買!
D嘢偏貴,我哋都係四圍影下相算啦!
可愛的BB
BB的媽咪
10:40 離開蘆葦島,雖然呢度係商業D,但係我好鐘意呢度!
再上遊艇,三個多小時後,14:00到達Isla Amantani
嘩!咁高,行死人咩!因海拔高,行小小斜路都會非常氣喘!
終於行到上嚟!當地民宿主人已經在等我哋!導遊將我哋16人分為四組,每四人入住一個民宿家庭!
之後各自跟民宿主人回家,來接我哋的,係一個只有十七歲的妹妹,很怕羞的,當用頭巾”嬲”住個頭,不過可能係習俗!
14:20 終於到達!民宿環境比預期中好好多喎!
房間都唔錯,兩人一間房!
家有無敵大海景!
原來媽媽在廚房,不過都係好怕羞,無出嚟招呼我哋!我哋送咗d米,糖及通粉俾佢哋,接過後向我哋道謝!
14:30 好肚餓啦!終於有飯食!先來簡單的薯仔湯!
再來清淡的薯仔飯+…..魚? 唔係呀,原來係芝士嚟架!芝士可能係由羊駝奶而做,我真的吃不慣,其餘的薯仔飯,加鹽後把它吃清了!如果你叫我喺呢度住一個星期,即刻瘦身成功!
飯後,係時候向我哋晒冷………帽,冷襪!嘩原來全都係佢同家人織架!手工好好!Pattern同顏色都好靚,全都是羊駝Alpaca的毛織成的!
一頂冷帽要兩星期織起,賣Sol 25( HKD 70) 一頂,手工貨,價錢好ok!大家大有收獲!
15:30 跟住仲有節目,先跟妹妹上山
沿途見到其他民宿養的羊羊
其實係好短嘅路程,我哋行咗30分鐘,終於到達呢個Stadium
見到我影佢,更加”嬲”得實一實!
在Stadium上,等埋其他團友
跟住導遊向我哋講解呢個島的風俗文化,話於Pachatata(Father of the earth之意)山頂上有Tiahuanaco文明的遺跡喎!
講完之後,就係操練體能嘅時候啦!唔係化…?係呀!就係要上呢個 Pachatata山嘅頂呀!
死就死啦!
Amantani島風光
嬸嬸,你咪係頭先擺地攤嗰位?你又跟埋上嚟?原來佢地為咗想做我哋生意,特登跟埋上嚟架!辛苦晒囉!不過我已經買咗,唔再買架啦!你搵第個啦….
行咗40分鐘,終於上到嚟,好辛苦!上面好凍,好大風!
其實都唔知邊度係”Tiahuanaco文明遺跡”,中心呢個位置鎖住咗,話用來敬拜Pachatata架!
好多檔攤,但賣的貨物很類似,競爭好大下喎!
最鍾意都係呢d帽,第二度(包括之後的Taquile Island)賣的無呢度織得咁靚,如果想買,就要喺度掃貨啦!做手信唔錯的!
見佢哋真係即場打冷….
即場織o架!
欣賞日落,不過d相影得唔好!
18:00 開始落山,民宿爸爸在山腳等我哋接我哋返屋企!
18:40 回到民宿
19:10 晚餐—又係薯仔湯同薯仔飯,不過今次好d,有d汁!
民宿爸爸於”客廳”
呢個係”飯廳”,其實一眼睇晒,就係咁大!
今日節目未完喎!就係去舞蹈晚會啦!每個民宿家庭都會借出民俗衫俾客人出席晚會,而且仲幫我哋著衫!
20:30 開始啦!樂隊係由幾個中小童組成!
跳的都係簡單舞步,不過一齊玩,都好開心!
跳下跳下,車厘子覺得有d悶,於是一反傳統,發起玩拉龍,大家一齊加入,好好玩!
呢班中小童樂隊嘅阿頭明示我哋要俾Tips佢哋!但係我哋無帶錢出嚟,於是問咗其他團友借住先!
其他團友
怕羞的民宿主人
最後,仲跳到室外,原來有堆火,圍住堆火跳,好有氣氛喎!
[youtube http://www.youtube.com/watch?v=AX5I4WM8jR8&hl=en&fs=1]
21:40 回民宿,地方咁簡陋,梗係無地方沖涼啦!不過天氣咁凍,唔沖都罷囉!
房間被鋪乾淨,亦夠暖,自己帶來的睡袋也用不著!
民意調查:今日篇嘢長咗d,唔知大家like定唔like呢?
沒有留言:
張貼留言