31/10/10(日) 智利—聖地牙哥Santiago
由邁阿美飛往智利的聖地牙哥,需8小時,比邁阿美又快1hr,所以係當地時間08:30,即係慢香港11小時!由香港到智利,全程需時36粒鐘,對自己來講真係一個創舉!
順利出關,不過壞消息即到,我哋四人嘅行李一D影踪都無,天呀!出師不利!唯有辦手續登記啦!航空公司職員話搵返D行李後,應該可以聽日中午時份送到去我哋住果間Hostal,應該?遲咗咁點先?再遲一日我哋飛去Easter Island啦喎!職員俾咗個網址及電話我哋,叫我哋聽日自己再check,咁就打發我哋走啦!我哋諗,D行李九成九仍然留在邁阿美,趕唔切轉機啦!唯有寄望聽日有好消息!
跟住再於機場兌換智利,兌換價當然不及市內抵,但係今明兩日都係公眾假期,所以穩陣起見,都係唱多小小先!
平均兌換價Peso, 1 US=472 CLP, 1HKD=61CLP, 1 US=HKD7.77
打算去的士櫃枱購票入市區,點知先俾個舉牌人兜截,問要不要的士,問下價,要15000 CLP,講價至12,000 CLP(HKD197)即成,而且架車都幾唔錯喎!
11:00 15分鐘後,已到達市中心的Hostal Santa Lucia!地點方便,價錢ok,房間清潔,職員友善,懂英語,值得推介!
有電腦上網及Wifi服務
客廳
原本於網上先book咗兩間雙人套房(27000 CLP/room),點知佢俾咗其中一間係有四張床的,間房都ok大,咦?咁不如四個人一間房仲抵啦!即時轉軚,四人一房共US 60.7/room/Night,共住三晚,四人共可省回HKD 1200呀,夠俾陣間果餐埋單有餘!
於Hostal報了明天去瓦爾帕萊索Valparaiso的day tour,34000 CLP(HKD 557)/P,因為聽聞此地治安較差,為安全計,都係跟團好D!
13:10 安頓好後,正式開始行程啦,但居然係先去買手信,係!無錯,因為呢個”聖盧西亞手工藝中心Centro Artesanal Santa Lucia”近我哋間Hostal,而且聽聞價值比較相宜,但營業時間至17:00,所以要先去!
必買的摩艾像!聽聞復活節島上買要貴很多架!(後期印証,都唔係相差好遠啫,只要你識講價!)
車厘子的戰利品
"聖盧西亞手工藝中心"位於"聖盧西亞山公園”對面
購物完後,搭的士2300CLP(HKD38)往中央市場Mercado Central開餐!
入面非常熱鬧,有食市,賣紀念品檔,同埋魚市場;有表演跳舞的人,有彈吉他唱歌的人,仲有好多拉客的人,叫你去幫襯他的食市!
我哋選擇咗最多人同最大間的Augusto餐廳
叫咗隻細嘅皇帝蟹,原價49800 CLP,講價至40000 CLP(HKD 656)
表演開蟹 [youtube http://www.youtube.com/watch?v=0dvhyzqd6vw&fs=1&hl=en_US]
味道唔錯,咁遠嚟到都要試下,不過我都係覺得日本長腳蟹好食d!
足料海鮮湯
埋單共60000 CLP(HKD 984)/4人,價錢OK,始終係海鮮蟹餐嘛!
食完蟹餐之後,原本打算行落去武器廣場,點知原來Central Market外有一間大型超市,不如先買定去Easter Island嘅糧餉啦!一於咁話,買完食物後,再搭的士回Hostal 2600 CLP.
返到Hostal, 一掂到張床就大件事,大家都唔願再郁,終於一齊休息到18:00再出外!
18:00 步行無幾遠就搵到大腿咖啡店,好彩仲未關門,叫咗杯moka 咖啡950CLP,都幾好飲,不過醉翁之意不在咖啡,而係—-女侍應的大腿囉!要感受一下當地文化,到此一遊是不錯的選擇!
之後係咁咦都要去一去d”景點”—憲法廣場,國會大廈,總統府,前國會大廈,審判法庭,美術館等
最後就是武器廣場Plaza de Armas.
今日是萬聖節,所以武器廣場上特別熱鬧,有很多化了妝的小鬼來討糖吃!
武器廣場上的大教堂,正在舉行儀式,但仍開放給遊人參觀!
20:00是日觀光完畢,大家都不覺得肚餓,所以都係唔食晚餐,早d返Hostal休息!回Hostal後吃了小小餅乾!行李不在,非常不方便,連睡衣都無,激死!希望聽日會收到行李啦,如果唔係真係超唔方便呀!
沒有留言:
張貼留言